ხშირად, როდესაც ავტომობილის ტექინსპექტირების თარიღი ახლოვდება, ავტომფლობელებს უჩნდებათ კითხვა: „რა მოწმდება ტექინსპექტირებისას?“ იმისათვის, რომ გრინვეიში მოსულ ყველა მძღოლს ჰქონდეს სრული ინფორმაცია და პასუხები მნიშვნელოვან კითხვებზე, მოვამზადეთ ბლოგი, სადაც ნაბიჯ-ნაბიჯ განვმარტავთ, რას ამოწმებენ ინსპექტორები და რატომ არის ეს აუცილებელი.
გამაფრთხილებელი ნიშნების მაჩვენებელთა დაფა
ინსპექტირებისას ერთ-ერთი პირველი მაჩვენებელთა დაფა მოწმდება.
დაფის თითოეული ნიშანი გვაფრთხილებს მანქანის სისტემის შესახებ. თუ ნიშნები, როგორიცაა სამუხრუჭე გამაფრთხილებელი ან ABS არ მუშაობს, მძღოლი არ იქნება ინფორმირებული სერიოზული პრობლემის შესახებ, რაც ძალიან მნიშვნელოვანია ავტომობილის უსაფრთხოებისთვის.
გამაფრთხილებელი ნიშნების მაჩვენებელი დაფის გამართულობა ინსპექტორებსაც აძლევს საშუალებას, ზუსტად განსაზღვრონ ხარვეზები და დროულად მიუთითონ მძღოლებს პოტენციური პრობლემების შესახებ.
საჭის მდგომარეობა
როგორც სხვა მექანიკურ ნაწილებს, საჭის სისტემასაც ახასიათებს ცვეთა.
გაცვეთილმა ან არასწორად განლაგებულმა საჭემ შეიძლება მართვისას კონტროლის დაკარგვა გამოიწვიოს. საჭის არასწორმა პოზიციამ ასევე შესაძლოა გამოიწვიოს საბურავების არათანაბარი ცვეთა, რაც ხშირად ხდება ავარიების მიზეზი.
საჭის მდგომარეობის შემოწმება აუცილებელია როგორც უსაფრთხოებისთვის, ისე ავტომობილის სტაბილური მართვისთვის.
საბურავების მდგომარეობა და პროტექტორის სიმაღლე
პროტექტორები გადამწყვეტ როლს თამაშობს სველ ან მოლიპულ პირობებში, რასაც რამდენიმე მიზეზი აქვს:
მოჭიდება: პროტექტორი უზრუნველყოფს საბურავების მოჭიდებას გზის ზედაპირზე. თუ პროტექტორი ძალიან გაცვეთილია, მანქანამ შეიძლება დაკარგოს მოჭიდება, რაც გაზრდის მოცურების რისკს, განსაკუთრებით წვიმასა ან თოვლში... ;
წყლის განდევნა: პროტექტორის სიღრმე ხელს უწყობს წყლის განდევნას საბურავის ზედაპირიდან, ამცირებს ჰიდროპლანირების შანსს, სადაც საბურავები კარგავენ კონტაქტს გზის ზედაპირთან წყლის გამო;
დამუხრუჭება: პროტექტორის სიღრმე/სიმაღლე უზრუნველყოფს უსაფრთხოდ დამუხრუჭებას. მოძველებული საბურავები ძალაუნებურად ზრდის დამუხრუჭების მანძილს, რაც პოტენციურად იწვევს უბედურ შემთხვევას;
თანაბარი ცვეთა: საბურავის შემოწმება აუცილებელია იმაში დასარწმუნებლად, რომ ყველა საბურავს გააჩნია თანაბარი ცვეთა.
საბურავებისა და დისკების მდგომარეობის შემოწმება
ინსპექტორი საბურავის დათვალიერებისას აფასებს:
- საბურავის წლოვანებას;
- პროტექტორის სიმაღლეს;
- საბურავში არსებულ წნევას;
- თანაბარია თუ არა ცვეთა.
დისკების შემთხვევაში კი:
- ხომ არ არის დისკი გატეხილი / გაბზარული;
- ხომ არ არის დისკი შედუღებული.
ეს კომპონენტები გადამწყვეტ როლს თამაშობს მანქანის კონტროლსა და დამუხრუჭების ეფექტურობაში.
საქარე მინის საწმენდების მდგომარეობა
საქარე მინის საწმენდების ტექნიკური მდგომარეობა მოწმდება, რადგან ისინი უზრუნველყოფენ მკაფიო ხილვადობას ნებისმიერ ამინდში.
გამართული საწმენდები მნიშვნელოვანია 3 მიზეზის გამო:
უსაფრთხოება: საქარე მინის საწმენდები გადამწყვეტ როლს თამაშობს მკაფიო ხილვადობის შენარჩუნებაში ისეთი ამინდის პირობებშიც კი, როგორიცაა წვიმა, თოვლი ან ნისლი. თუ საწმენდები დაზიანებულია, გაცვეთილია ან გამართულად არ ფუნქციონირებს, ამან შეიძლება გავლენა იქონიოს მძღოლის ხილვადობაზე და გაზარდოს ავარიების რისკი;
დაზიანების თავიდან აცილება: ეფექტურად მომუშავე საწმენდები ხელს უშლის საქარე მინის დაზიანებას. გაცვეთილმა საწმენდებმა შესაძლოა მინაზე დატოვოს ზოლები ან ნაკაწრები, რაც მაღალი რისკის შემცველია მძღოლისათვის;
კომფორტი: გამჭირვალე და სუფთა საქარე მინით მანქანით მართვა მძღოლისათვის გაცილებით კომფორტულია.
წინა ფარები და ნათურები
წინა ფარებისა და განათების სისტემა აუცილებელია როგორც მძღოლის, ისე გზის სხვა მომხმარებლების უსაფრთხოებისთვის.
წინა ფარების და ნათურების გამართულობა განაპირობებს:
მკაფიო ხილვადობას მძღოლისთვის - გამართული ფარები და ნათურები კრიტიკულად მნიშვნელოვანია, განსაკუთრებით დაბალი განათების პირობებში, როგორიცაა: ღამით ტარებისას, ნისლისა ან წვიმის დროს. გამართული განათება ამცირებს ავარიების რისკს, ეხმარება მძღოლს გზის და პოტენციური საფრთხის დანახვაში;
ხილვადობა სხვა მძღოლებისთვის - მანქანის ნათება ავტომობილს ხილულს ხდის ქვეითთათვის და სხვა მძღოლებისათვის. განსაკუთრებით ბნელი ან არახელსაყრელი ამინდის პირობებში. ეს ხელს უწყობს შეჯახების თავიდან აცილებას, რადგან გზაზე მოძრავ სხვა პირებს შეუძლიათ დაინახონ მანქანის პოზიცია და მოძრაობები და თავი აარიდონ მას;
ხილვადობის დახშობის პრევენცია - არასწორი დახრის კუთხის მქონე ფარებმა შეიძლება გამოიწვიოს შემხვედრი მძღოლისთვის ხილვადობის დახშობა. ინსპექტირება უზრუნველყოფს ფარების არასწორი დახრის კუთხის იდენტიფიცირებას სხვებისთვის საფრთხის თავიდან აცილების მიზნით.
ციმციმის სიხშირე
ციმციმის სიხშირე აუცილებელია:
სათანადო კომუნიკაციისათვის: ციმციმა არის ძირითადი გზა, რომლის საშუალებითაც მძღოლები აცნობენ საკუთარ განზრახვებს გზის სხვა მომხმარებლებს;
ელექტრო სისტემის გადატვირთვის პრევენციისათვის: ციმციმის გახშირებულმა სიხშირემ შეიძლება გადატვირთოს ელექტრო სისტემა, რაც ავტომობილს დააზიანებს;
რეგულაციების დაცვისათვის: ავტო მწარმოებლების უმეტესობას აქვს რეგულაციები, რომლის მიხედვითაც დგინდება ციმციმის სიხშირის დიაპაზონი (მაგ. 90 ± 30 ციმციმი წუთში). შემდგომი შემოწმებებისას აუცილებელია, რომ ავტომობილი ამ დადგენილ წესებს აკმაყოფილებდეს სრულფასოვანი ფუნქციონირებისთვის.
ავტომობილის იდენტიფიკაცია
ტექინსპექტირების გავლისას, დიდი მნიშვნელობა აქვს ავტომობილის იდენტიფიკაციას და საბუთებში მოცემული ინფორმაციის ფაქტობივ სიტუაციასთან შესაბამისობას.
ინდენტიფიკაციისას მოწმდება შემდეგი დეტალები:
- ავტომანქანის ტიპი, მარკა, მოდელი;
- საიდენთიფიკაციო ნომერი (ვინ კოდი);
- სახელმწიფო ნომერი (ნომრის ფირფიტა და მისი მდგომარეობა);
- საჭის მდებარეობა (მოდიფიკაცია);
- საწვავის ტიპი (გაზის ინსპექტირების სერთიფიკატი არსებობის შემთხვევაში);
- კატალიზატორული კონვერტერი (კატალიზატორი);
- ტაქოგრაფი;
- სიჩქარის შემზღუდველი.
ძრავის ნაკვეთური
ძრავის ნაკვეთური ავტომობილის საკვანძო ადგილია - ამ ნაწილის შემოწმება მნიშვნელოვანია რამდენიმე მიზეზის გამო:
- უსაფრთხოება - ძრავის ნაკვეთურში მოწმდება ნებისმიერი სითხის (გარდა წყლისა), მათ შორის საწვავის გაჟონვა;
- ძრავის მუშაობა - ღვედები, მილები და ფილტრები უნდა იყოს გამართულ მდგომარეობაში, რაც ხელს უწყობს ძრავის ოპტიმალურ მუშაობას;
- გამონაბოლქვის კონტროლი - გაუმართავი კომპონენტების (როგორიცაა კატალიზატორი ან ლამბდა სენსორი) გამოვლენა მნიშვნელოვანია ემისიების დაშვებული ნომრის ფარგლებში შესანარჩუნებლად;
- სითხის დონე და ხარისხი - ზეთის, გამაგრილებლის, სამუხრუჭე და საჭის სითხეების შემოწმება უზრუნველყოფს სათანადო შეზეთვას და ხელს უშლის გადახურებას;
- აკუმულიატორის მდგომარეობა - კოროზიის დონის შემოწმება ხელს უწყობს მანქანის დაქოქვასთან დაკავშირებული და სხვა ელექტრო პრობლემების იდენტიფიცირებას;
- პრევენციული მოვლა - მცირე პრობლემების ადრეული გამოვლენა ახანგრძლივებს ძრავის გამართულად მუშაობას.
გამონაბოლქვი
ძრავიდან გამომავალი მავნე ნივთიერებების შემცველობის შემოწმებისას, პირველ რიგში, წინასწარ ითვლება ძრავის ბრუნვა, შემდეგ კი სპეციალური მოწყობილობით მოწმდება CO და კვამლიანობა (დიზელის შემთხვევაში).
CO (ნახშირბადის მონოოქსიდი) მხუთავი აირია, რომლის დასაშვებ რაოდენობაზე მეტის შესუნთქვის შემთხვევაში, ადამიანები განიცდიან ჟანგბადის მიმოცვლის მოშლას, რა დროსაც სასიცოცხლოდ მნიშვნელოვან ორგანოებს ჟანგბადი აღარ მიეწოდება.
ხმაურის დონე
ხმაურის დონე აუცილებელია იყოს დაშვებული საზღვრების ფარგლებში:
- სამართლებრივი შესაბამისობა;
- ავტომობილის მდგომარეობა;
- საზოგადოებრივი უსაფრთხოება;
- გარემოს დაცვა;
- კომფორტი და ცხოვრების ხარისხი.
ფარების ნაკადი
ტექინსპექტირებისას ფარების ნაკადის შემოწმება მნიშვნელოვანია, რადგან ის სათანადო ხილვადობას უზრუნველყოფს.
- ფარების ტრაექტორია - თუ ფარები ძალიან დაბლაა დახრილი, ისინი არ ანათებენ გზას საკმარისად შორს, რაც ამცირებს ხილვადობას ღამით და ცუდი ამინდის პირობებში;
- თუ ფარები ძალიან მაღლაა აწეული, ისინი სათანადოდ არ ანათებენ გზას და შეიძლება მძღოლს გზაზე მნიშვნელოვანი დეტალები გამორჩეს;
- საგზაო ეტიკეტი - არასწორად განლაგებულმა ან ზედმეტად კაშკაშა ფარებმა შეიძლება “დააბრმაოს” საპირისპირო მხრიდან მომავალი მძღოლები, რაც ზრდის ავარიების რისკს, განსაკუთრებით მაგისტრალებზე და სიბნელეში;
- ელექტრო ან მექანიკური პრობლემების გამოვლენა - დაბალი სიმძლავრის ფარები შეიძლება მიუთითებდეს პრობლემებზე, როგორიცაა გაცვეთილი ნათურა, გაყვანილობის პრობლემები ან არასწორი განლაგება, რამაც შეიძლება გავლენა მოახდინოს მანქანის მთლიან მუშაობაზე;
- ადაპტაცია სხვადასხვა პირობებთან - სწორად განლაგებული ფარები უზრუნველყოფს სათანადო ხილვადობას, მიუხედავად იმისა, მართავთ ურბანულ პირობებში, მაგისტრალებზე თუ უგზოობაში.
მუხრუჭები
მუხრუჭების შემოწმება პრიორიტეტულია, რადგან მუხრუჭები მანქანის უსაფრთხოების ყველაზე კრიტიკული სისტემაა.
- უსაფრთხოება - მუხრუჭები ავტომობილის უსაფრთხოების ყველაზე მნიშვნელოვანი კომპონენტია. გაცვეთილმა ან გაუმართავმა მუხრუჭებმა შეიძლება საფრთხე შეუქმნას მძღოლს, მგზავრებს და გზაზე მყოფ ყველა პირს;
- ავარიების თავიდან აცილება - გამართული მუხრუჭები უზრუნველყოფს ავტომობილის ეფექტურად გაჩერებას, განსაკუთრებით საგანგებო სიტუაციებში, რაც ამცირებს შეჯახების რისკს;
- პრობლემის ადრეული გამოვლენა - ინსპექტირება გვეხმარება გაცვეთილი სამუხრუჭე ხუნდების, სამუხრუჭე სითხის გაჟონვის ან დახაზული/დაბზარული სამუხრუჭე დოლების იდენტიფიცირებაში, სანამ ისინი პრობლემად გარდაიქმნება;
- მართვის უკეთესი გამოცდილება – კარგად მოვლილი სამუხრუჭე სისტემა უზრუნველყოფს უფრო გლუვ დამუხრჭებას.
სავალი ნაწილი
სავალი ნაწილის მწყობრში ყოფნა მრავალ დეტალს განაპირობებს:
- სტრუქტურული მთლიანობა - შასის და ჩარჩოს შემოწმება უზრუნველყოფს, ჟანგისა და სტრუქტურული დაზიანების არსებობის დროულ გამოვლენას;
- საჭის ნაწილები - მოშვებულმა ან გაცვეთილმა საჭის დამაკავშირებელმა ნაწილებმა შეიძლება გამოიწვიოს საჭის დაუმორჩილებლობა - განსაკუთრებით მაღალი სიჩქარით გადაადგილებისას;
- სამუხრუჭო სისტემა - ნებისმიერმა გაჟონვამ, კოროზიამ ან დაზიანებამ შეიძლება გამოიწვიოს მუხრუჭის სრული გაუმართაობა - რაც გზაზე გადაადგილებისთვის მთავარი საფრთხეა;
- გადაცემის და დენის მიწოდების მონიტორინგი - შეუმჩნეველმა ცვეთამაც კი შეიძლება გამოიწვიოს ვიბრაცია და ენერგიის დაკარგვა;
- სითხის გაჟონვა - გაჟონვის ადრეული გამოვლენა ხელს უშლის ძვირადღირებული შეკეთებების საჭიროებას და სისტემის სრულ გაუმართაობას;
- გამონაბოლქვი და საწვავის სისტემები - საწვავის დაზიანებული მილები და გამონაბოლქვის კომპონენტები წარმოადგენს ხანძრის რისკს და შეიძლება გამოიწვიოს ტოქსიკური აირების შეღწევა სალონში.
ინსპექტირების დასრულება და დასურათება
ტექინსპექტირების დასრულების შემდეგ, ინსპექტორი უღებს მანქანას ფოტოებს, რაც ჩვენს სისტემაში ინახება. ინსპექტირების დროს აღმოჩენილი ფაქტები გადადის ინსპექტირების საბოლოო ანგარიშში და ამით სრულდება ავტომობილის პერიოდული ტექნიკური ინსპექტირების პროცესი.
საბოლოო ეტაპზე, ინსპექტორს ავტომობილი გამოჰყავს მფლობელთან და გააცნობს მას ტექინსპექტირების ანგარიშს დეტალურად.
გისურვებთ ტექინსპექტირების წარმატებით გავლას!
