უსაფრთხო გარემო, ადამიანების ჯანმრთელობა და მაღალი პასუხისმგებლობა - ეს ის მთავარი ფასეულობებია, რომელსაც კომპანია „გრინვეი“ განუხრელად იცავს და აფასებს.  

ჩვენ მოგითხრობთ ადამიანებზე, რომელთა საქმიანობაც ძლიერი სოციალური პასუხისმგებლობითაა გამსჭვალული და ხელშესახები სარგებელი მოაქვთ გარემოს უსაფრთხოებისა და ადამიანების ჯანმრთელობისთვის.

„ზერო ეფექტი“, ნული ნარჩენის პირველი სივრცეა საქართველოში, მელიქიშვილის 7 ნომერში, რომელიც ემსახურება გარემოზე ზრუნვას, ნარჩენების შემცირებით და ნული ნარჩენის ცხოვრების სტილის წახალისებით.

ანნი ჭყოიძე, კომპანია „ზერო ეფექტის“ თანადამფუძნებელი:

„ყველაფერი 4 წლის წინ, მე და ჩემმა ორმა მეგობარმა დავიწყეთ, მას შემდეგ რაც დავინტერესდით თუ სად მიდის ჩვენ მიერ გამომუშავებული ყოველდღიური ნარჩენი.

სივრცის შექმნის იდეა გაჩნდა სწორედ მას შემდეგ, რაც აღმოვაჩინეთ, რომ საქართველოში, ძალიან რთული იყო, ადამიანის ნეგატიური კვალის შემცირება გარემოზე. დავიწყეთ პლასტმასას ამოღება ჩვენი ყოველდღიური ცხოვრებიდან და მივხვდით, რომ არ არსებობდა ალტერნატივები და სივრცე სადაც თავმოყრილი იქნებოდა გარემოსთან მეგობრული, მდგრადი ნივთები. ასევე, არ იყო ხელმისაწვდომი ინფორმაცია, ქართულ ენაზე ნული ნარჩენის ცხოვრების სტილზე, ზოგადად ნაკლები იყო ინტერესი იმ პრობლემის მიმართ, რის წინაშეც დგას ჩვენი პლანეტა.

გადავწყვიტეთ, რომ ამ პრობლემის გადაწყვეტის გზების ძიებაში უნდა ჩავრთულიყავით, ვყოფილიყავით ინიციატორები და დაგვეწყო პირველი ქმედითი ნაბიჯების გადადგმა,ამიტომ  ჩვენივე რესურსით და ძალისხმევით შევქმენით „ზერო ეფექტი“, სოციალური საწარმო და სოციალური მოძრაობა.

ნული ნარჩენის ფილოსოფია, (ან ნულოვანი ნარჩენები) არის ნარჩენების წარმოქმნის პრევენციაზე ორიენტირებული პრინციპების ერთობლიობა, რომელიც ხელს უწყობს  რესურსების სასიცოცხლო ციკლის გარდაქმნას/გახანგრძლივებას, რათა ჩვენს ხელთ არსებული ყველა პროდუქტი გამოყენებულ იქნეს მრავალჯერადად ან მუდმივად, იმისთვის რომ გვქონდეს ნაკლები გადაუმუშავებელი ნარჩენი.

მაქსიმალურად ვცდილობთ, რომ ჩვენს მაღაზიაში წარმოდგენილი პროდუქტები იყოს უსაფრთხო,  პირველ რიგში ადამიანებისთვის და იმ გარემოსთვის სადაც ვცხოვრობთ: ნატურალური ინგრედიენტებით და მასალებით შექმნილი, სახლის პირობებში კომპოსტირებადი, უმეტესად შეფუთვის გარეშე და შეფუთვის შემთხვევაშიც, მარტივად გადამუშავებადი, ან უკვე გადამუშავებული მასალისგან დამზადებული.

ჩვენთან მოქმედებს შეფუთვის დაბრუნების პრინციპიც, რაც გულისხმობს, რომ შეფუთვას ვიბრუნებთ, თავიდან ვიყენებთ და მომხმარებელი არ იხდის შეფუთვის თანხას, შესაბამისად არ რჩება ნარჩენიც.

ზერო ეფექტის სივრცე, მაღაზიის გარდა, არის ადამიანების შეკრების, ინფორმაციის და ცოდნის გაცვლის ადგილი. თითქმის ყოველ კვირას ვმასპინძლობთ სხვადასხვა ღონისძიებებსა და აქტივობებს: თემატური ფილმის ჩვენებები, ლექციები გარემოს დაცვის თემატიკაზე, ეკო-მეგობრების შეხვედრები, ნივთების გაცვლა-გამოცვლა და ა.შ აღნიშნული აქტივობების მიზანია, გავზარდოთ ინტერესი მოსახლეობაში გარემოს დაცვით საკითხებზე და ნარჩენების პრობლემაზე.

ჩვენი მიზანი იყო იმ ქართველი მეწარმეების მხარდაჭერა, ვინც მწვანე მიმართულებით აწარმოებს სხვადასხვა პროდუქტს - მათთვის დამატებითი გაყიდვების არხის შექმნა და წახალისება. გადავწყვიტეთ, ამსეთი მეწარმეებისა და მათი მომხმარებლების გამაერთიანებელი ჰაბი გავმხდარიყავით, რომელიც ადამიანებს ერთი იდეის გარშემო გააერთიანებდა და ერთობლივი ძალებით დაიწყებოდა ცვლილებები.

პანდემიამ, სხვების მსგავსად, ჩვენი სამუშაო პროცესი და გეგმებიც შეაფერხა, თუმცა აქტიურად ვმუშაობთ გაფართოებაზე და ვაპირებთ უცხოურ ბაზარზე გასვლას, ვინაიდან ქართულ ეკო მეგობრულ ძალიან კონკურენტული ფასი აქვს. გვინდა ამისთვის სხვადასხვა პლატფორმების გამოყენება, მათ შორის - ამაზონის.

საბოლოო ჯამში, „ზერო ეფექტი“ გვინდა, რომ გახდეს მწვანე მოძრაობების გამაერთიანებელი ჰაბი, ჩვენ კარგად გვესმის, რომ რეალური შედეგებისთვის მნიშვნელოვანია ერთობლივი მუშაობა, ბიზნეს კომპანიების, მომხმარებლების, რიგითი მოქალაქეების ჩართვა, რადგან ეს ყველა ჩვენგანის გარემოა.